【專家分析】市監局查Nvidia唔會出大事？

【Now財經台】美國總統當選人特朗普(Donald Trump)最近透露，曾經同國家主席習近平通話，但冇透露其他細節，雙方對上一次溝通已經係3年前，今次通話係咪代表中美關係回暖？但與此同時，央視新聞昨日(9日)指，英偉達(Nvidia)涉嫌違反反壟斷法，市監總局已依法立案調查，事件對Nvidia以至中美關係有咩影響？

高富金融集團投資總監梁偉民認為，其實中美對立已經預咗，雙方關係唔再惡化已經好好，對內地經濟嚟講，中美衝突絕對係一大隱憂，但Wyman認為亦唔需要太擔心，除非美國真係將對華關稅上調至60%或以上，又或者有其他制裁行動，否則，市場已有足夠準備應對。未來幾個月，除咗留意關稅問題，亦要留意內地有冇應對策略。

至於立案調查Nvidia，Wyman相信只係一個警戒作用，內地唔會因此唔再買Nvidia晶片，事實上，亦冇其他替代品。佢又指，反而要留意美國針對Nvidia晶片出口到內地嘅禁令，依家Nvidia嘅高階晶片唔可以賣畀內地，若未來禁止再升級，所有晶片都唔可以賣畀內地，影響就非常嚴重。