【名家給力場】細劉私有利福有機加價

【Now財經台】上周二(3日)開市前宣布停牌嘅利福中國(02136)，獲主席兼大股東，人稱「細劉」嘅劉鑾鴻提私有化，每股作價0.913元，較停牌前有逾21%溢價，利福今朝(9日)復牌股價一度大升逾29%，依家係咪私有化嘅好時機，點睇今次嘅私有化出價？

《香港股票財技密碼》作者梁杰文指，對大股東嚟講依家絕對係私有好時機，港股經歷早前嘅牛市後，開始慢慢回落，令細價股交投都比較有彈性，呢啲因素都有利大股東私有化，對小股東嚟講，公司業績倒退、估值低殘下，為佢哋提供一個有溢價，將股份變現嘅機會，相信會有唔少股東支持私有化。

Mike又認為，今次私有價較6月底嘅每股資產淨值(NAV)有折讓，但今次交易特別之處在於大股東之後，可因應市場環境變化選擇提高出價，以增加私有化成功機率，一般企業宣布私有化後市價會有折讓，但利福股價反而大升，反映市場憧憬遲啲會有加價空間。