【專家分析】「快閃戒嚴」後吼韓股 買「三叔」長揸

【Now財經台】南韓總統尹錫悅昨晚(3日)突然宣布「戒嚴」，但國會迅速通過解除戒嚴令，其後尹錫悅亦正式宣布撤戒嚴令，結束僅持續逾6個鐘嘅戒嚴事件，市場解讀為政黨爭拗，南韓股市今朝(4日)如常開市，首爾KOSPI指數今早低開約2%，今次事件對金融市場有咩影響？點睇高盛話依家係買韓股嘅機會？

潤淼資產管理董事盧志威指，今次戒嚴事件由開始到結束只係幾個鐘，令韓圜出現輕微震盪，但金融市場嘅震盪已經完結，因為市場已經預咗國會一定會「做嘢」，例如啟動彈劾總統程序，所以對金融市場影響唔大，短期內回穩完全冇問題，但股市要回升就有難度。

William續指，南韓政局一向複雜，今次突襲式戒嚴，短期嚟講一定係負面，但由於國會反應迅速，令政局好快回復穩定，加強投資者對南韓股市嘅信心，亦會對當地嘅穩定性加分，中長線係一個買入機會。佢認為可以考慮買入龍頭股，例如三星電子(Samsung Electronics)呢類半導體股會較穩陣。