【財經TOP SEARCH】美團屬高Beta股短期不宜睇得太淡

【Now財經台】截至早上11時止，1小時內《彭博》用戶搜尋量最多港股，依次為中國中藥(00570)、藥明生物(02269)、美團(03690)、世茂集團(00813)及中國移動(00941)。

美團上周出咗第3季業績，經調整溢利好過預期，新業務虧損又大減，不過，股價喺放榜後持續向下，今日(3日)一度跌4%，低見160.7元，美團股價未來會點走？下一個催化劑幾時會出現？

富途證券首席分析師譚智樂指，美團收入、盈利呢啲大數好過市場預期，雖然利潤率比預期跌得多，但主要受季節性因素影響，其實喺依家經濟環境低迷下，美團仍交到一份唔錯嘅業績，反映管理層執行能力仍然好強。不過，若經濟持續疲弱，市況冇太大起色，加上估值偏高，難免對股價造成壓力。

不過，Arnold認為，美團屬於高Beta股份，所以短期唔適宜睇得太淡，投資者可以喺波幅區間150元至170元炒上落。