【專家分析】唔好高追Tesla及Bitcoin

【Now財經台】美國通脹數據出爐前夕，加上美債息抽高，美股3大指數昨晚(12日)全線低收，係總統大選後首次出現調整，由於「Trump Trade」略為降溫，Tesla股價昨晚收市挫6%，特朗普旗下Trump Media & Technology Group(DJT.US)更大跌9%，不過，比特幣(Bitcoin)價格仍企喺88000美元，係咪可以趁美股回調，高追最受惠「Trump Trade」嘅Bitcoin？

潤淼資產管理董事盧志威指，雖然Bitcoin及Tesla股價都係特朗普勝選嘅贏家之一，但佢認為市場有過分樂觀之嫌，特朗普嘅政策唔會一夜間推出，依家市場主要由投資情緒驅動，所以呢類資產好難估頂，情況類似10月初嘅港股，當時投資情緒好亢奮，不過，當呢啲資產轉向時，可以大冧近20%至30%，佢認為，現階段唔係入市好時機，唔建議高追。

William又指，如果真係想依家買Bitcoin，博幣圈之後傳嚟好消息，建議小注買入，唔好瞓身入市。