【期匯決算】大選結果出爐前唔好大手買美元

【Now財經台】美國上季國內生產總值(GDP)初值升幅放緩至2.8%，略低過預期，不過，有「小非農」之稱嘅ADP私人企業就業職位，10月新增23.3萬個，較預期多逾1倍，明日(11月1日)出爐嘅非農數據會唔會遠好過預期，繼而左右議息決定？美匯指數後市又會點走？

亨達集團助理總經理羅明立指，除非美國周五(1日)出爐嘅非農數據偏離市場預期，否則，美國聯儲局今年應該會繼續溫和減息，後市亦要睇埋總統大選結果，共和黨總統候選人特朗普(Donald Trump)傾向減息，美匯指數暫時喺104.5水平有阻力，估計短期會出現調整，但整體走勢仍比其他貨幣強。

佢又話，過去一段時間，美匯指數一直喺100至106上落，要突破呢個區間唔容易，建議投資者低買高沽，而大選結果出爐前唔好太大倉位入市，避免市場震盪。