【專家分析】AH價差股「尋寶潮」難持久

【Now財經台】中聯重科(01157)今日(18日)喺大成交下抽升10%，呢隻AH價差股昨日(17日)收市後出通告，指計劃伺機回購H股，又提及回購H股係想進一步加強投資者對公司嘅信心，早前港股急升期間，都炒過一浸AH股價差收窄，當時中聯重科H股係短時間內由4.5元升到6元，市場依家係咪又趁機再炒AH股價差收窄？呢個概念仲有冇得炒？

亨達財富管理董事總經理姚浩然表示，過往港股及A股不時會炒AH股價差異，希望可以收窄AH股差距，市場會搵內地A股價格偏高嘅股份，H股就會搵估值偏低嘅股份，估計呢個「尋寶潮」唔會持續太耐，因為即使搵到港股估股值平嘅股份，唔等於可以喺內地市場沽出，仍然要喺港股市場沽出，只係高買高賣。

佢又話，如果想繼續炒AH股差價概念，要揀折讓較大，而業績唔太差嘅股份。