【專家分析】內房股博反彈宜短不宜長

【Now財經台】近期中央密集出招救樓市，包括下調首期比例、減存量房貸息，以及放寬或撤銷限購等，有消息指，北京、杭州等地成交轉趨活躍，加上滙豐證券指最新救市政策，令該行認為內房出現轉捩點會提早1年至明年出現，並上調多隻內房股目標價。不過，高盛仍睇得較保守，雖然預期內房今輪反彈或較以往持久，但如果基本因素唔改善，內房仍好難轉勢，到底內房股值唔值博？

潤淼資產管理董事盧志威指，近期內房股係較值博，始終係中央重點打救嘅範疇，依家出台嘅政策主要針對去庫存及穩定樓價，若要長期反彈，資金及就業等因素缺一不可，加上中央剛開始救樓市，要推高樓價仍然較難，但暫時出台嘅措施相信都足夠，投資者可以博內房股有個短期反彈，但中長線而言，未必可以變成高增長板塊。