【專家分析】iPhone 16谷唔起Apple股價？

【Now財經台】萬眾期待嘅蘋果公司(Apple Inc.)發布會已經完結，一如預期推出一系列新產品，包括iPhone 16系列，但市場更關注嘅Apple人工智能(AI)功能Apple Intelligence，反而冇透露太多相關消息。iPhone 16系列定價唔係太進取，仲話Apple AI唔會跟iPhone 16同步推出。依家Apple每股盈利增長係科技七雄(Magnificent 7)中最慢，再睇埋今次發布會，係咪唔適宜對Apple業績抱太大期望？

高富金融集團投資總監梁偉民指，依家每一代Apple產品升級明顯度都唔高，功能又冇太大突破，所以好多Apple用家寧願等舊機報銷先再買新機，事實上，iPhone收入已出現倒退，反映需求唔大，因此，iPhone 16系列定價都唔敢太進取。

Wyman又指，現時Apple市盈率(PE)逾30倍，其實唔太合理，因為過去1年收入增長唔算亮麗，所以Apple現價係偏貴。佢續指，市場最期待唔係手機硬件，而係加入AI功能，雖然市場6月開始已炒作Apple會推出AI功能，並期待會刺激iPhone銷售，但因為發佈會冇透露太多，所以都要等iPhone16系列10月發售後，再睇下Apple股價有咩表現，現階段唔好對集團業績有太大期望。