【期匯決算】英鎊短線有機見1.34

【Now財經台】據最新期權押注顯示，交易員對英鎊嘅睇法係2020年以嚟最牛，過去5日，英鎊係十國集團(G10)貨幣中升幅最大，市場似乎博美國9月一定減息炒起英鎊，但英鎊過去兩周累升逾3%，衝上兩年高位，但喺1.321水平似乎有阻力，利好因素反映晒未？仲有幾多水位？

連連STAR FX總經理陳欣指，由於英國通脹較頑固，英倫銀行可能要押後減息，所以英鎊有機會再升。此外，現時英國經濟唔錯，第2季國內生產總值(GDP)有增長，製造業或服務業採購經理指數(PMI)都持續向上，都會支持英鎊向上。

技術走勢方面，陳欣指，若英鎊可以上到1.32，短線好大機會見1.34水平，相反，如果突破唔到1.32，可能會出現整固，若1.305水平搵到支持，加上基本因素理想，相信英鎊可以保持升勢。