【名家給力場】拆解今輪日圓拆倉潮(上)

【Now財經台】環球股市經歷兩日大跌後反彈，以為今早(7日)會靜一靜，點知日本央行官員突然出口術，提到唔會喺金融市場唔穩定嘅時候加息，令到日圓今早一度轉弱至147水平，日股早段曾抽升逾1000點。日圓拆倉加埋美國經濟陷入衰退嘅憂慮，觸發全球冧市，原本市場拗緊呢隻鑊應該由日央行，還是美國孭，但日央行一出口術，市場即時回穩，似乎日圓拆倉先至係冧市「元凶」？

「股市漁夫」創辦人莊志雄指，都可以咁講，最大觸發點係日央行加息多過市場預期，因為之前累積大量利差交易(Carry Trade)，又冇人知道有幾多，不過，德意志銀行(Deutsche Bank)估計有20萬億美元，咁只能聽大行講，因為冇準確嘅統計或指標，可以知道真正有幾多Carry Trade存在。

Lewis又指，有部分槓桿真係好勁，但如無意外都應該「死晒」，睇返日圓長短倉分布，如果去到零就代表長短倉都冇，但呢個係高盛嘅統計，如果由負數轉正數，就代表做日圓短倉嘅人幾乎全部被「夾死晒」，如果純粹係「偷雞」用槓桿做，呢類嘅Carry Trade如無意外都「死晒」。