【名家給力場】王良享:Yen仲有3%至4%潛在升幅

【Now財經台】日本央行昨日(7月31日)爆大冷，宣布年內第2次加息。繼3月由負利率加息至0.1厘，當局今次將政策利率提升15個基點至0.25厘，並將進一步縮減每月買債規模。

日央行行長植田和男暗示仍有加息空間，指未有將0.5厘作為政策利率上限。臻享顧問董事總經理王良享認為，未來2年日本息口有機會升至1厘，因為當地有3項內憂外患驅使日央行繼續加息。

首先係為防止第二波輸入通脹來襲，因為當地核心通脹率已連續17個月維持2%以上。第二係為撐起日圓匯價，王良享分析指，日本長期息率正加速上升，目前20年期日本國債孳息率接近1.8厘，有利吸引部分日圓資金回流到日本投資。此外，王良享認為，日央行或憂慮美國前總統特朗普(Donald Trump)有機會重返白宮，到時可能又將日本列為貨幣操縱國，影響日本企業出口。

王良享續指，美匯指數年初至今累升約2%，而期內日圓兌美元貶值逾6%，意味日圓匯價仲有3%至4%嘅潛在升幅，相信日圓將持續走強。

不過，佢估計，日匯轉強至145兌一美元時會行人止步，因為大部分日本企業係以145水平作為公司預算嘅匯率標準，如果日央行操之過急，匯價太快轉強至140水平以上，就會削弱日本產品嘅出口競爭力。