【專家分析】炒藥明康德要留意兩樣嘢

【Now財經台】藥明康德(02359)昨晚(29日)派咗上半年績表，股價今日(30日)一度升逾7%，睇返呢份業績，其實收入、毛利、純利都要跌，其中，半年純利跌逾20%，不過，第2季按季有改善，收入及經調整淨利按季增長逾10%及20%，加上券商普遍對集團維持全年收入指引有正面評價，下半年業務係咪有機會進一步改善？

信達國際研究部董事趙晞文指，雖然藥明康德股價今日午後升幅收窄，但整體表現仍跑贏大市，又認為上半年業績比下半年更重要，而每項業務透明度都好高，整體而言，第2季業務大致符合市場預期。

Hayman又話，依家市場應該將焦點放喺兩個位，首先係公司管理層會唔會修正及調整全年指引，不過，由於之前已調整過，相信再調整機會好微，其次係市場會留意藥明康德定單情況，因為會左右業績表現，但暫時嚟講集團定單情況唔錯。