【now.com財經】香港樓價指數連續下跌五個星期,有老友話香港樓市將會繼續下跌,原因是一班學者在一個研討會上話香港樓市是一潭死水,樓市想唔跌都唔得。學者唔知道,香港樓市如果是一潭死水還好,就算繼續下跌都唔會跌得幾多,而事實上香港樓市好似正在被抽乾的魚塘,唔使幾耐,當魚塘乾塘的時候,魚塘中的魚就會被捕捉,業主就是魚塘中的魚。
好多人唔信,香港有咁多銀行,甚至是國際級銀行,點解會冇水,點可以話香港樓市正在乾塘,老實說,香港業主真的不明白,在抵押品足夠之下,不少業主仍然被銀行call loan call到失魂,可以咁講,絕大部份業主在同樣的抵押品之下,欠銀行的錢比一年前少了很多,即是大部份業主被銀行抽了水,唔係每一個業主都準備充足,有實力不足業主就好似乾塘的魚,被迫賣走部分抵押品,如果長此下去,銀行繼續call loan,又唔借錢俾人買樓,總有一日,樓市會乾塘,所有業主都變成乾塘的魚,任人捕捉。
不過,漁塘的主人亦知道,雖然乾塘可以輕易捕捉漁塘的魚,但魚塘乾塘之後,冇三五年都唔可以飼養到足夠斤両的魚,換句話說,乾塘捕魚等如殺雞取卵,最後受到最大傷害的反而是漁塘主人,所以,有經驗的漁塘主人是不會讓魚塘乾塘,他們在水位較淺時捕捉體積較大魚,除了可以賣得好價錢之外,最大目的是讓較少的魚在沒有大魚虎視眈眈之下,可以較容易繁殖生存,否則,整個魚塘最後只得幾條大魚,本來可以賣到錢的魚都被大魚食了,不合生計。