【名家給力場】地產股死貓彈 有貨減磅套現

【Now財經台】美國通脹全面降溫，昨晚(11日)出咗消費物價指數(CPI)數據後，據最新利率期貨顯示，聯儲局9月減息機會率急升至逾90%，到底美國今年會減幾多次息？

冠域商業及經濟研究中心主任關焯照估計，美國9月及11月都有機會減息，不過，睇返聯儲局內部做嘅經濟增長預測，第2季增長約2%，連同第1季都係低過去年第3及第4季，依家好似行緊1995年條路，即係今年及明年唔會減好多次息。

至於可受惠於減息嘅地產股、REITs及公用股，其中，地產股仍面對供應問題，拖住復甦嘅後腿，地產股反彈係咪只係死貓彈？關博士指，地產股反彈唔代表樓市反彈，純粹係之前跌得多，依家減息預期升溫，部分投資者就冚淡倉，部分短期就揸上去，一旦政府出招，例如將公私營房屋比例改為8比2，起多啲公屋，就會有啲支持，但都要搞返好經濟，外圍減息係幫唔到太多，佢又建議，地產股已升咗唔少，宜減磅套現。