【名家給力場】買Bitcoin要等蟹貨消化後(上)

【Now財經台】比特幣(Bitcoin)價格今個星期一度跌穿55000美元，跌至今年2月以來低位，如果睇返資金流，由於Bitcoin價格上落好快，有短炒憧憬，係咪短線資金流入得快啲？長線資金有冇繼續留低？

「股市漁夫」創辦人莊志雄指，可以用3個角度去分析Bitcoin，首先係資金流，今年推出咗Bitcoin現貨交易所買賣基金(ETF)，令參與呢種工具嘅人大增，包括唔太認識Bitcoin或唔想開Crypto Wallet去投資嘅人，應該係虛幣新手較多，Bitcoin現貨ETF推出初期，即5月底6月初有較多資金流入，當時Bitcoin已見咗高位，之後好多人趁低吸納。

佢續指，今個星期又見到有人趁低吸納，但力度同上次差好遠，佢認為呢啲資金以短線跟風為主，有個網站叫lookintobitcoin係好有趣，可以計到短線及長線資金，前者係1個之內，後者就1至2年，兩者取態係好唔同，喺Bitcoin現貨ETF推出時有短錢追入出現高峰，但同2017、2018、2021年高峰仍相差好遠，但長線資金係完全冇跟進，反映係唔會高追，反而會吼低位開始回升時買Bitcoin，今年成個第2季都冇動靜，睇返往績長線資金應該係Smart Money，而喺Bitcoin價格一直上返去，長線資金就不斷減磅，呢個都要留意。