【FINTERVIEW】港股跌到呢個位可博反彈

【Now財經台】三中全會將於下周開幕，A股及港股觀望氣氛濃厚，其中，港股成交連日唔夠1000億元，A股方面，早前滬深兩市成交連續4個交易日唔夠6000億人仔，係咪要等三中全會過後，外資先會重新回流A股？A股及港股下半年又會點走？

金馬資本管理交易策略師蘇沛豐指，近年A股及港股表現弱勢，所以外資配置偏低，由於市場繼續觀望三中全會，導致近期交投淡靜，佢估計，三中全會過後，下半年嘅經濟發展政策會更加明朗，若政策有驚喜，而市場又有信心，相信會吸引更多外資流入A股。

港股方面，Daniel話依家仍以上落市為主，估計恒生指數下半年大部分時間會喺16000至20000點上落，雖然有機會升穿20000點，但相信好快會獲利回套，佢建議投資者等恒指回落至17000點先做博反彈部署。此外，由於A股估值高過港股，若三中全會政策冇驚喜，加上缺乏上升動力，A股較難跑贏港股。