【專家分析】姚浩然:A股下半年上升動力唔大

【Now財經台】內地股市上半年表現欠佳，其中，上證指數累跌0.2%，創業板指數更累跌近11%，A股出現外資撤離、成交萎縮嘅情況，滬深兩市成交金額自上周五(21日)起持續低於7000億人仔，被市場視為股市催化劑嘅「三中全會」，將會喺下月召開，預期會議會推出咩政策？對A股又有咩影響？

亨達財富管理董事總經理姚浩然估計，會繼續針對房地產市場進行改革，鼓勵市民買樓，但由於過去唔少政策嘅成效唔顯著，原因係市場睇樓價走勢同以往唔同，唔認為樓市係大漲小回，反而係可升可跌，加上買樓意欲低咗，入市態度更審慎。

展望A股下半年表現，Patrick估計，A股好大機會繼續喺低位徘徊，因為內地企業盈利增長動力放緩，市場未必接受較高估值，預期上證綜合指數繼續喺3000點上落，又認為上升空間及動力都唔大。