【名家給力場】美股有貨跌穿呢個位要離場(上)
【分析】 2024/06/12 16:04
![](/CMS_images/NewsImageBig/FIN-BNC-GEILIA-PT1-240612-1300.jpg)
【Now財經台】蘋果公司(Apple. Inc.)股價昨晚(11日)破頂,帶動標指及納指再破頂,不過,兩個指數嘅中線市寬都同指數背馳,似乎升勢集中喺某啲股份,係咪一個需要驚惕嘅訊號?值得留意係,呢個情況今年一直持續,後市又會係點?
「股市漁夫」創辦人莊志雄指,暫時未見到指數有咩問題,如果投資者揸住一直破頂嘅「萬億股王」,可以繼續持有,但就要留意其他持貨,因為美股頭50隻市值最大股票,今年第2季後波幅突然擴大,而且係歷年來最大,波幅擴大容易導致股價急挫,事實上,有部分股份已開始受影響。
Lewis又話,雖然指數靠「股王」破頂,但市寬就向下,紐約交易所中線市寬更跌穿50強弱分界,出現市寬同指數背馳嘅情況,踏入6月市寬甚至未有回升,情況係非常罕見,而納指情況更差,所以投資者要留意,如果手上持股已跌穿50天線,建議要先行離場。
莊志雄又指,喺極端背馳嘅情況下,除非市寬回升,否則,指數會被拖低,現時市寬係反映美國經濟現況,高盛經濟驚喜指數已跌至今年低位,反映近期美國經濟數據差過預期,要留意對股市嘅影響。