【名家給力場】特專科技新股晶泰「背景」冇得輸抽得過？

【Now財經台】特專科技上市規則生效逾1年，終於出現第1隻經呢個渠道上市嘅新股，內地人工智能(AI)藥物研發公司晶泰科技(02228)，明日(4日)開始招股，上市前投資者星光熠熠，包括騰訊控股(00700)、紅杉資本中國及Google等，集團合作伙伴有輝瑞(Pfizer)、強生(Johnson & Johnson)等。

《香港股票財技密碼》作者梁杰文指，好少見到新股嘅投資者或合作方係全球知名嘅公司，加上晶泰3位創辦人都係美國麻省理工博士，財力及背景都無可挑剔，投資者自然有信心。

晶泰去年收入1.74億元，按年增長30%，不過，梁杰文覺得唔合格，就算將收入直接當為利潤，市盈率(PE)最少超過40倍，估值非常昂貴，令人質疑公司嘅模式係咪可以持續。

Mike又稱，AI始終需要大量數據訓練先支持到藥品研究，但晶泰冇喺招股書披露相關藥品研發資料，而同公司合作嘅藥企龍頭輝瑞、強生，亦可發展AI藥品研發，同晶泰直接競爭，所以晶泰喺行業中係咪有長遠嘅生存空間，仍然係未知之數。