【專家分析】Q1業績前瞻:騰訊加碼回購機會唔大

【Now財經台】騰訊控股(00700)今日(14日)收市後會出首季業績，股價暫時連升4日，今早一度升逾1%，高見384.8元嘅52周高位。《彭博》綜合市場預測，預期騰訊首季收入按年增長近6%，經調整盈利則增長32%。

不過，華盛證券財富管理部董事李偉傑預期，上季遊戲收入將按年錄得單位數倒退，除咗受高基數影響，亦因為期內冇乜新遊戲推出，而去年下半年推出嘅合家歡派對遊戲《元夢之星》未能吸引到大量「流水」。佢又預期，廣告業務會延續去年復甦勢頭，連同視頻號商業化業務及金融科技業務，成為集團首季嘅盈利增長亮點。

至於第2季，Jason指旗下新手遊《地下城與勇士》嘅韓服吸金能力相當強，令市場憧憬下周二(21日)喺內地正式上線後，將刺激整體流水進一步增加。

此外，佢相信騰訊加碼回購嘅機會唔大，並認為目前回購規模已經足夠抗衡來自南非大股東Naspers拋售持股嘅沽壓，但預期股價升至400元關口後有較大沽壓。佢又指，投資者反而可以留意資本開支(CAPEX)今年有冇增長，話集團投入資源研發更有效提升股東回報價值。