【槓桿致勝】恒指好淡倉擺位宜闊少少

【Now財經台】港股升勢持續，恒生指數今朝(14日)走勢反覆，好倉連續3日有資金流出，昨日(13日)流出4840萬元，5日合計，有1.5億元資金流出。淡倉方面，連續3日有資金流入，昨日流入約233萬元，5日合計，有1.3億元資金坐貨。此外，牛熊證街貨比例55%對45%，牛證重貨區下移至18200點，熊證重貨區則於19500點。

重磅科技股今日開始派成績表，恒指有冇力再上？貼價牛證同現價有逾600點距離，有冇肉食？中薇證券研究部執行董事黃偉豪表示，恒指後市的確好視乎科技股業績，始終大市由低位16000點水平，升到今朝暫時即市高位19300點水平，已經升咗逾3000點，惟市底及氣氛都係好，雖然資金走好倉入淡倉，但依家做反手部署，都不宜太進取，如果做睇好部署亦要小心即市波動性，因此，不論睇好睇淡擺位都適宜闊少少，以好倉為例，收回價擺位約18200、18300點樓下較好，淡倉就擺19800點樓上。