【FINTERVIEW】趁美股大選前調整買貨？

【Now財經台】美國4月非農新增職位僅增17.5萬個，失業率亦爆冷升至3.9%，令聯儲局可能早返少少減息嘅預期升溫，早前主席鮑威爾(Jerome Powell)暗示，因為美國經濟仍然強，減息時間可能比預期更遲，但就業數據出爐後，點估聯儲局減息時間？

富邦銀行(香港)投資策略及研究部主管潘國光指，聯儲局除咗要考慮經濟及通脹問題外，由於今年係美國大選年，局方都有一個「護盤責任」，基於選戰問題，唔排除拜登政府會透過財政部或聯儲局官員，加埋經濟數據調校，包括非農及下周公布嘅通脹數據，其實都係一啲初步數據，之後都會修訂，佢估計，踏入5月及6月，市場見到嘅數據都會係「軟著陸」，會係靚仔嘅數據，唔會出現衰退或通縮，亦唔會通脹大幅回升。

Vicks又估計，下周出爐嘅4月消費物價指數(CPI)會係market friendly嘅數據，聯儲局可以唔使咁鷹，唔一定要7月或9月減息，如果睇返美股，其實對減息問題唔係咁緊張，年初至今已升逾10%，利率期貨由當初估今年減息7至8次，到依家只係估1至2次，反映股市唔係擔心減幾多次息，反而係最緊要經濟有增長，唔好陷入衰退，企業盈利繼續改善，依家聯儲局就係配合呢個「軟著陸」狀況，聯儲局可能7月或9月減息，美股大幅調整空間唔大，可能只係約3%，佢又認為，投資者會趁呢個調整買貨。