【期匯決算】離岸人仔短線7.3有支持

【Now財經台】內地今早(16日)出咗首季經濟增長、零售及固投等數據，雖然經濟增長超預期，但零售增長差過預期，數據出爐後，離岸人仔一度轉弱至7.283，跌至4個月低位，其後搵到支持。摩根士丹利最新估計，美國聯儲局推遲減息，亞洲央行有可能跟隨，人仔後市會點走？

連連STAR FX總經理陳欣指，雖然內地經濟增長好過預期，但市場關注嘅房地產數據仍弱，加上零售及工業生產都弱，人仔繼續反覆偏弱，而中美息差持續擴闊，以及日圓愈跌愈有，都不利人仔走勢。Chase估計，離岸人仔短線喺7.3水平會有支持。