【期匯決算】Yen短期或下試155水平

【Now財經台】美國減息時間或進一步推遲，美匯指數重上105水平，非美貨幣就顯著向下，日圓昨晚(10日)一度跌穿153水平，跌至逾34年低位。日本財務大臣鈴木俊一指，日圓匯價過度波動唔可取，唔排除採取任何措施應對，其後日圓跌勢略為喘定，到底日圓要跌到邊個水平，日本政府先會出手？

亨達集團助理總經理羅明立指，根據過往經驗，日本央行喺152水平已經會有行動，但今次跌穿153水平都冇出手，炒家會繼續推低日圓，因為美日息差仍對日圓不利。不過，佢指出，日央行行長近期提及，日本通脹正朝著目標水平進發，之後就未必需要太多刺激措施，而今年仍會加息，但由於日央行態度較為穩陣，日圓或要再試低位，短期或下試155水平。