【FINTERVIEW】內地要等「五一黃金周」推高通脹

【Now財經台】內地今早(11日)出咗3月居民消費價格指數(CPI)，雖然已連升兩個月，但升幅放緩至0.1%，差過預期，按月更轉跌1%，終止3個月升勢。睇返CPI走勢，擔唔擔心內地再陷入通縮？

資深經濟學家林樵基認為，都要考慮返假期因素，2月農曆新年後，由於市場供應復常，導致3月食品價格按年跌2.7%，消費者經歷1月及2月呢輪消費後，或會留待「五一黃金周」再消費，所以會影響3月通脹，CPI低過預期反映內地消費仍然疲弱。佢又估計，4月CPI仍會持續低迷，但喺「五一黃金周」消費需求將顯著增加下，5月CPI可望升至一個較高水平。

內地為應對通縮，人民銀行要繼續實施寬鬆政策，但美國最新通脹高過預期，令6月減息預期急降溫，中美息差係咪會繼續困擾人仔？林樵基表示，人行都要取捨，如果再降準或減息，係可以刺激消費，但如果消費動力不足，會令人仔走弱，不過，內地可以透過公共財政政策，例如減稅刺激經濟，整體嚟講，人行要喺貨幣政策及公共政策之間搵到平衡，先可以令經濟穩定落嚟。