【名家給力場】中資股步入復甦期？(下)

【Now財經台】瑞銀昨日(21日)有份報告，將中資股依家嘅情況，同2015至2016年復甦時期比較，因為情況都幾類似，包括中央放寬內房政策及銀根、嚴格監管IPO、禁止沽空及「國家隊」入市，如果對比2015及2016年，中資股後市會步入復甦期，還是繼續反覆？

勝利瑞柏基金管理合伙人暨投資總監陳建良指，今年1月股市「窒息」，流動性不足，尤其係藍籌表現認真麻麻。依家流動性恢復返，公司多咗現金，派息及回購能力亦都高咗。對比2015至2016年，最大分別係地緣政治，當時冇咁複雜，美國總統奧巴馬(Barack Obama)同中國關係良好，加上內房危機影響財富效應，對A股及港股都有影響，係需時復原，依家全球利率亦比當時高，呢3個因素會壓低估值，令公司健康咗之餘，估值又冇之前咁高，所以呢段時間會有一啲股份進入復甦階段，而另一啲就會持續反覆，經濟層面會分化，所以個市唔會一面倒或全面上升。