【名家給力場】日本加息後Yen不升反跌係正常(下)

【Now財經台】日本央行結束負利率政策，17年以來首次加息，不過，日圓及日債表現反高潮，日圓跌穿151，債息又顯著向下，係咪市場解讀為日央行實際上會繼續寬鬆？

「股市漁夫」創辦人莊志雄指，議息結果公布前，好多人諗住日央行會加息，或者已經結束超寬鬆貨幣政策，所以可能好多盤等緊Long Yen，但有時事情發生後，唔係跟住大衆意願去行，例如英偉達(Nvidia)峰會都有類似情況，股價喺峰會後升唔到，最重要日央行行長植田和男嘅言論，市場解讀為「鴿派地加息」，而Yen嘅反應顯示，市場質疑日央行嘅做法控唔控制到通脹，所以Yen就不升反跌。

Lewis續指，植田已講明會保留大量靈活性，保持寬鬆政策，亦表明冇緊急加息嘅必要，可能佢認為通脹會持續回落。市場反應方面，即使今次係萬眾期待，但今次加息仍然唔係全票通過，所以兩年期利率都見頂回落，10年期利率更誇張，知道日央行放棄孳息曲線控制(YCC)政策後，亦指會保留大量彈性，可以隨時再買長債，見到長債息回套返最近一半升幅，所以日圓有咁嘅反應係正常，因為日央行都講明會再買返債，似乎唔係正式結束超寬鬆貨幣政策。