【期匯決算】Yen唔好睇得太淡

【Now財經台】日本一如預期告別負利率時代，日本央行17年來首度加息，又取消債券孳息率曲線控制(YCC)政策，而行長植田和男喺今日(19日)記者會上嘅言論亦趨向鴿派。雖然日本進入加息時代，但日圓不升反跌，美匯指數就連升4日，美元兌日圓一度失守150關口，日本10年期債息亦向下，但金融市場反應冷靜，日股更重上40000關，係咪因為預期日圓中線會進一步轉弱？

獨立外匯商品分析師盧楚仁指，日央行早已暗示會取消YCC政策，但連交易所買賣基金(ETF)都唔買就真係有啲意外，但由於市場基本已接受咗呢啲消息，所以反應冷靜，對Yen嘅支持有限，唔排除短期仍有輕微下跌空間，日央行曾表明唔希望日圓升穿152，所以投資者要小心，一旦Yen見151、152水平，日央行或會出手干預，暫時唔適宜睇淡，若當地通脹持續升溫，日央行或會再加息，到時日圓可睇高一線。