【FINTERVIEW】林樵基:內地「以舊換新」勢頭好

【Now財經台】內地今早(18日)出咗今年首兩個月「三頭馬車」數據，其中，零售按年增長5.5%，略差過市場預期，但市場其實都預咗增速會較去年11月至12月嘅7%慢，所以表現係咪唔算好差？「兩會」提及要大力谷內需推動經濟，其中，上周公布推動大規模設備更新及消費品以舊換新，可唔可以刺激到消費？

資深經濟學家林樵基認為，零售數據唔算太差，可以用一個穩定模式去睇現時嘅消費，過去1年正逐步復甦，所以唔可能期望一個農曆新年就會爆發性上升，佢認為之後都係傾向穩步上揚，唔好期望會錄得好大升幅。

至於谷消費政策，林樵基認為，如果想措施成效大，背後嘅流動性供應好關鍵，中央今年不斷出手撐經濟，包括減稅、發債等，例如想推動換車等都需要資金，依家債務上升緊，如果將資金撥到呢方面，相信都會有正面影響。佢又指，以舊換新唔係新政策，最重要係個周期可唔可以適應，而疫後係一個推動嘅好時機，因為呢幾年改變咗好多，有好多新科技，相信以舊換新會有一個好勢頭。