【名家給力場】美國通脹真係走到最後一里？(上)

【Now財經台】美國2月核心通脹按月升0.4%，連續兩個月高過預期，但標指繼續創收市新高，似乎市場唔係好理會通脹數據，無論減息預期高低，美股似乎都可以繼續破頂？

「股市漁夫」創辦人莊志雄指，如果想美股繼續升，聯儲局就要放棄打擊通脹，除非聯儲局表明不論通脹指標係咪回升都唔會理，美股先有機會升，但就會犧牲咗長債，因為通脹始終會慢慢升返上去，而長債價格就會冇反應，其次係要犧牲美金，其實同日本一樣，只要貨幣貶值就可以谷高股票指數，而主流媒體成日話通脹係最後一里(Last mile)，已經講咗8個月，只要講得愈來愈多，喺呢種氣氛主導下，就會令人相信通脹一定會回落，唔理正式通脹指標係咪回升緊，就可以令股市或指數繼續升。

Lewis又留意到，大部分通脹報道都係講按年及按月變化，但其實聯儲局主席鮑威爾(Jerome Powell)係會睇以3個月或6個月年率化嘅核心通脹率，尤其係個人消費開支(PCE)，而過去12個月嘅年率化核心CPI昨日(12日)顯示仍然向下，不過，如果睇3個月或6個月就見到通脹已經回升，而前者更升至4.1%，加上之前做咗超級核心通脹指標，呢個指標係連租金都撇除埋就升4.5%，是9個月以來最高水平，反映升勢都幾凌厲。