【FINTERVIEW】美孳息曲線倒掛時期就完？

【Now財經台】美國明日(12日)會出2月通脹數據，市場預期，消費物價指數(CPI)按年升維持3.1%。富邦銀行(香港)投資策略及研究部主管潘國光認為，上月通脹可能好似1月咁稍微高過預期，加上周三(13日)公布嘅零售樹據亦預期表現強勁，相信屢創新高嘅美股會出現短暫而輕微嘅調整。佢認為，為實現經濟「軟著陸」同今年嘅美國總統大選，聯儲局今年會繼續護盤，維持美股向上嘅走勢。

此外，現時美國國債孳息曲線仍然倒掛，2年期及10年期債息分別約4.48厘同4.06厘。Vicks預期，聯儲局好大機會進行債市扭曲操作，令6至7月會出現返正常、向上傾斜嘅孳息曲線。佢分析指，本周財政部針對地區銀行嘅一年流動性措施屆滿，但目前美國地區銀行仍有流動性風險，估計聯儲局會透過沽長債、買短債嚟支持短期流動性。