【專家分析】「撤辣」後吼價殘兼高負債本地地產股

【Now財經台】樓市全面「撤辣」後，在剛過去嘅周末，一二手交投都出現「小陽春」，一手最少錄得約443宗成交，按周大升17倍，其中，「撤辣」後首個推出的全新樓盤，恒基地產(00012)旗下Belgravia Place首批138伙全數沽清。二手方面，十大屋苑過去兩日有27宗成交，係逾1年以來最多，但都係要蝕讓，呢個「小陽春」係咪可以持續，繼而帶動本地地產股？

潤淼資產管理董事盧志威認為，依家明顯見到成交被托起，呢個情況係會刺激到啲買家出嚟，一定會利好數量，但價錢就係未知數，雖然買家多咗，但一二手仍有好多單位要賣，尤其一手靜咗成年，最有可能出現嘅情況喺刺激好多人換樓，同埋收租客會入市，如果租金回報去到3厘至4厘，就當鎖定定期存款。佢又指，由於發展商會推優惠去庫存，估計未來會係成交量升，但價格平穩。

盧志威又指，本地地產股係可以留意，尤其係跌得比較多嘅高負債公司，趁依家較易去貨，同埋個價靚咗，呢類股份都值博。