【FINTERVIEW】支持高負債民企內房政策唔足夠

【Now財經台】A股龍年開局唔錯，人民銀行喺農曆年長假前降準，昨日(20日)就大手減貸款市場報價利率(LPR)，反映中央穩住樓市嘅決心，港股噚日喺人行減LPR後反應唔大，但今早(21日)大幅上升，恒生指數一度升逾500點，係咪市場憧憬人行或中央會繼續出手？

獨立股評人蘇沛豐認為，內房最壞時間已經過咗，但相信違約、倒閉、清盤仍會發生，因為樓價及新樓成交仍然冇起色，同埋唔係所有發展商都會納入「白名單」，所以仍有違約壓力，由於投資者始終憂慮爛尾樓問題，對入市仍有戒心。

佢認為，市場依家炒緊政策預期，昨日人行減LPR內房股其實應該會有反應，但等到今日先升，相信同臨近「兩會」憧憬有更多政策出台有關。不過，內房基本因素始終唔係咁好，尤其現時針對高負債民企嘅政策支持仍然唔足夠，所以資金揀股時都寧願揀有國企背景嘅內房，因為勝在穩陣，而民企內房短期反彈後，唔排除有再尋底風險。