【期匯決算】油價上半年炒上落

【Now財經台】伊朗最新在阿曼灣扣押美國運油輪，美國及英國聯手報復胡塞武裝進行大規模攻擊，令中東緊張局勢加劇，刺激油價一度升約3％。有分析指，油價有力再升，又話油價喺現水平被低估最少10美元，究竟係咪低估咗咁多？

英皇期貨營業部總裁葉佩蘭指，油價呢波升勢同供求問題冇關，而係同中東局勢有關，因為中東局勢持續發酵，美國及英國亦加入戰團，相信短期內好難解決，令油價有支持。

佢又話，油價已形成雙底，之前紐約期油成功守住每桶68美元至69美元水平，其後轉升，一度高見76美元，若中東局勢進一步惡化，紐油又升穿76美元阻力，短期會繼續向上。由於供應暫時仍然充裕，估計需求下半年先有機會增加，預期油價上半年會維持窄幅上落格局。