【名家給力場】標指2024年難破頂？(上)

【Now財經台】美股噚日(2日)開局失利，3大指數僅道指向上，標指就微跌，納指更跌逾1%。不過，道指、納指喺2023年尾相繼破頂後，目前仍於高位徘徊，究竟標指喺2024年有冇機會破頂？「股市漁夫」創辦人莊志雄認為，有幾項指標反映標指破頂機會唔大。

Lewis分析指，標指喺過去70年只試過3次可以喺美國債息倒掛後500個交易日內收復失地，但最終都回落到孳息曲線倒掛前水平。由2022年6月中，10年期同1年期國債孳息曲線開始倒掛起計，至今已經過咗385個交易日。佢話，如果標指真係破頂，後市有可能要跌返落3700點水平。

佢又指出，過去3次收復失地嘅時候，標指經調整市盈率(CAPE)皆處於當時中位數或以下水平。然而目前32倍嘅CAPE明顯高於中位數，即16倍，但過去100年來，標指只喺兩個時期可以由32倍再炒上，分別係2000年對付「千年蟲」，以及2020年新冠疫情後嘅超低息環境。