【名家給力場】鮑威爾講錯嘢點補鑊？(下)

【Now財經台】美股11月以來顯著反彈，納斯達克100仲升穿7月高位，創近兩年新高，上次議息前後聯儲局主席鮑威爾(Jerome Powell)指金融市場正發揮作用，幫手收緊信貸，聯儲局就唔使做嘢，不過，佢講完之後，金融市場就幫手「放水」，股債都升，鮑威爾下次係咪要改口，要做返啲嘢？

「股市漁夫」創辦人莊志雄認為，鮑威爾上次提及「The Market Is Doing Its Work」係咩意思？可以參考高盛金融狀況指標，每次呢個指標上升，就代表收緊銀根，鮑威爾講話前，即9月至10月底，呢個指標抽咗上去，鮑威爾認為市場幫手做緊嘢，收緊銀根，導致當時嘅金融狀態比較緊張。鮑威爾講咗呢句說話，市場認為佢暗示停止加息，指標即掉頭向下，代表金融狀態寬鬆咗，作用等同「放水」，所以過去1個月股市、債市嘅方向基本上都係一致。

佢又話，喺呢個情況下，由於市場預期變成「放水」或停止加息，導致有一個放鬆作用，各類資產價格喺11月有個「鬆一口氣反彈」(relief rally)。

但依家銀根鬆返，係咪代表金融市場冇發揮作用？原本鮑威爾講話金融市場正發揮作用，但依家冇幫手「收水」，唔係發揮作用，咁佢下次出嚟可以講咩？還是要繼續加息？呢個對未來市場有好大影響，例如...。假如之後出嚟講話講返轉頭、加息周期未完結，就會好影響股、債市表現。如果之後係keep住當睇唔到金融狀態寬鬆咗，任由佢寬鬆，就要犧牲美金大跌。但呢個都係未有結果，如果美元持續回落就可能有一個訊號比我地，但訊號目前未能夠確認。