【期匯決算】Yen續於150水平波動

【Now財經台】日圓昨日(13日)再創33年新低，直迫152水平，但之後又彈上151.1水平，綜合市場分析，日圓反彈唔係日本央行(BOJ)出手干預，而係同美日期權有關，昨日有12億美元期權到期，明日(15日)更會有23億美元期權到期，媒體指呢啲期權嘅觸發(Trigger)價都係152，係咪要有心理準備日圓呢兩日會比較Chok？

連連STAR FX總經理陳欣認為，影響日圓嘅因素主要有兩個，包括美債孳息壓住日圓導致走勢偏弱，同埋日央行嘅政策取向。佢又話，日圓今次見150，日央行都只係「出口術」，唔排除跌至152水平會進一步下試低位，估計央行底線喺150至155。此外，日央行亦要睇經濟，日本國內生產總值(GDP)連續幾季都錄得正數，似乎唔需要再行寬鬆貨幣政策，但實際上製造業採購經理指數(PMI)低過50，貿易數據唔理想，日央行或透過寬鬆政策刺激經濟。

佢又指，若日央行取消債券孳息率曲線控制(YCC)政策，一旦債息扯高，政府嘅債務支付成本就會上升，唔排除今年會維持超寬鬆貨幣政策，日圓就繼續喺150水平波動。