【期匯決算】油價反彈要等埋OPEC+開會

【Now財經台】雖然美元回升，但油價及金價反而向好，紐約期油及倫敦布蘭特期油都上返關鍵位，即每桶75及80美元水平，但上升動力仍然偏弱。巴克萊認為，油價近期跌過龍，雖然下調咗明年油價預測，但布油仍睇93美元，之前高盛更預期明年中見100美元，有冇信心升到呢個水平？

英皇期貨營業部總裁葉佩蘭認為，暫時油價跌勢仲未喘定，依家75美元水平仲未見底，可能要落到68至74美元，因為去年都喺呢個位置打底再升返上去。佢又話，相信年底係一個關鍵，如果石油輸出國組織及盟友(OPEC+)開會後，決定維持減產計劃，油價有機會上升。