【名家給力場】美國3隻必買AI概念股

【Now財經台】雖然英偉達(Nvidia)未出第3季業績，但股價近日由400美元一度炒上480美元水平，據英國《金融時報》報道，Nvidia再為中國「度身訂造」3款性能較低嘅人工智能(AI)晶片，目的係避開美國政府禁令。此外，被市場稱為「元宇宙第一股」嘅Roblox上月初登陸Playstation後，股價裂口上升，而數據分析軟體公司Palantir亦係季績後裂口上升嘅股份，呢啲股份係咪都值得睇好？

冠域商業及經濟研究中心主任關焯照指，Nvidia針對中國市場開發新晶片，目的係減低美國新規對銷售嘅影響，加上依家AI係全球經濟主軸，同AI有關嘅公司都比較賺錢，佢估計，Nvidia股價未來有機會升穿500美元。

關博士又話，Roblox股價時好時壞，但10月初登陸Playstation後，加上業績理想等因素，令到股價升得唔錯，至於Palantir從事AI及軟件相關業務，最近又攞到政府合約，業績亦持續改善，加上食正AI熱，都可以繼續睇好呢啲股份。