【名家給力場】港銀年底前需要追加P？

【Now財經台】聯儲局維持聯邦基金利率喺5.25厘至5.5厘區間不變，連續兩次暫停加息係意料中事，市場更關心今次議息聲明提到，金融環境收緊或令經濟、通脹受壓。

臻享顧問董事總經理王良享分析指，9月議息會議至今，10年期國債孳息率曾觸及5厘，美股受壓，期間美匯指數上升約1.5%，垃圾債券溢價亦升0.6%，意味非投資評級企業嘅舉債成本貴咗1.2%，上述情況加埋已相當於加息0.25厘三次嘅效果，削弱加息動力。佢預期，只要美國財政部仍有好大發債需求，長債息率好難大幅下跌，反而喺未來一兩個月有機會調高。

此外，王良享認為，年底前本港銀行冇需要跟美國追加最優惠利率(P)，指目前本地貸款需求疲弱，加上大型港銀普遍活期及儲蓄存款較按揭貸款多約兩倍，如果要加P，就要相應上調存款利率，將影響銀行盈利。