【名家給力場】切忌生錢變死錢(下)

【Now財經台】美國債市持續有異象，例如將美國長債交易所買賣基金(ETF)同納指100 ETF走勢拍埋睇，大部分時間都係同步，但今年第2季有一段時間係異常地唔同步，美國長債ETF跌，但納指100 ETF升，期間美股喪炒人工智能(AI)，預期通脹回落及息口見頂等，依家睇返轉頭，當時係咪炒錯咗？

「股市漁夫」創辦人莊志雄指，依家睇返一定係，當大家一窩蜂去做一件事，短線係可以唔跟基本因素，但大部分時間都要跟，點解揀美國長債ETF及納指100 ETF分析，因為呢啲資產唔係睇今日，而係睇未來，前者係未來20年嘅現金流，後者部分公司依家係冇盈利，都係著眼於未來10、20年，公司愈做愈好，將來有現金流時，就可以折現返去今日，就可以做一個估值。

Lewis又話，呢啲Long duration assets最怕利率向上，因為要喺未來嘅現金流折現返去今日，利率愈高就愈唔值錢，今次個債喺2021年已見頂回落，因為債券投資者對通脹敏感度較高， 長債真正大跌係2022年開始，初期一路拖住納指落去，兩者表現幾乎一模一樣，2022年呢兩類資產價格都係跌約30%。