【名家給力場】3個數據反映美經濟已陷衰退？(上)

【Now財經台】據美銀最新基金經理調查顯示，受訪者預期，美國今季出現經濟衰退嘅機會，較9月調查時大減至5%。不過，「股市漁夫」創辦人莊志雄擔心，歷史上美國政府公布經濟衰退會有滯後，而從以下3項經濟數據急速轉差可見，當地經濟可能已步入衰退。

Lewis分析指，9月美國信用卡消費按月驟降，急跌程度跟3月矽谷銀行(SVB)倒閉時差唔多。此外，美國大部分產品類別嘅消費開支數據亦按年大跌，其中，百貨公司銷售跌近20%、電子產品銷售亦跌近10%，兩個數據都反映主力支撐美國經濟增長嘅消費數據突然轉差。

佢續指，現時有約40個州份較去年多咗逾20%人持續申領失業救濟金，而過去幾次經濟衰退時，正正同持續申領失業救濟金人數升幅顯著嘅州份明顯增多嘅時期重疊。

Lewis預期，若美國今年第4季已陷入經濟衰退，但華府可能會等到明年6月至9月先正式宣布，並指2008年金融海嘯時，當局就喺9月雷曼兄弟爆煲前後，先宣布2007年末次按危機起，美國已進入衰退。