【名家給力場】美國經濟難軟著陸(上)

【Now財經台】美國眾議院通過罷免議長麥卡錫(Kevin McCarthy)，加上市場憂慮聯儲局會維持高息一段更長時間，道指今年升幅昨晚(3日)已經蒸發晒兼倒跌，投資者原本預期聯儲局第3季加完息，明年初就會減息，並憧憬美國經濟可以軟著陸，但睇返美股嘅表現，似乎反映美國經濟要硬著陸？

「股市漁夫」創辦人莊志雄認為，美國經濟會硬著陸，上季唔少人預期會軟著陸，因為加息周期就快完，而經濟數據表面上又唔太差，但市場似乎忘記咗通脹上升周期嘅歷史，仲以為個玩法係通脹回落期，呢代人喺上世紀80年代開始投資到依家，都習慣咗通脹長期回落嘅情況，每次加完息利率就好快回落，央行因通脹回落就可以減息減得好狠，甚至做埋QE(量化寬鬆)救經濟，今次同過往每次大衰退前嘅講法都一樣，就係預期經濟會軟著陸，例如2007、2008年，當年連央行官員都係咁講，但最後經濟陷入衰退。

Lewis又話，每次聯儲局「收水」都會影響全球金融狀態，而今次加息速度之急，係過去幾十年未見過，所以今次冇事發生及可以軟著陸嘅機會近乎零，佢估計未來一定會「有事」發生。