【名家給力場】朗生醫藥年半前已鋪路私有化？

【Now財經台】朗生醫藥(00503)獲主席兼控股股東吳鎮濤，提出以每股1.8元私有化公司，較股份停牌前有逾27%溢價，朗生今日復牌一度急升23%，高見1.75元。

《香港股票財技密碼》作者梁杰文估計，私有化好大機會通過，又認為公司高層去年已就私有化鋪路。佢分析指，去年4月，公司突然以溢價11%配股，聲稱集資所得近6000萬元會用嚟做併購，同埋補充一般營運資金，然而，過去年半，公司動用逾3000萬元做咗80次回購，即逾半集資所得用嚟做回購。

Mike續指，朗生配股前已手持逾3億元現金，集資所得又冇用嚟發展業務，雖然承配人以溢價接貨，但股價好快已升穿配股價1.2元，計埋1.8元嘅私有化作價，帳面上利潤可觀，因此，估計公司當日可能趁股價低迷，配股畀友好人士，以確保有足夠支持票通過私有化。