【名家給力場】關焯照:人行「放水」谷唔起經濟

【Now財經台】人民銀行今日再降準「放水」，內地今朝出嘅重磅經濟數據表現又唔錯，尤其零售數據，帶挈港股今日一度升逾300點，雖然早段曾短暫輕微倒跌，但最新都升逾200點，到底人行再「放水」對大市有幾大幫助？

冠域商業及經濟研究中心主任關焯照認為，恒指一度升逾300點，主要受內地零售數據超預期帶動，因為數據符合市場對內需嘅憧憬。

不過，佢認為降準幫助唔大，因為降準後釋放出嚟嘅流動性，未必會流入實體經濟。內房方面，主要視乎企業借唔借到錢，有大行估計，今次降準最多釋放6000億人仔，數目唔算大，其實之前內地經濟差嘅時候，人行都曾經降準，但當時都冇乜反應。

關博士又話，內房依家係面對資金問題，賣唔到樓，就算有流動性都冇用，加上內房息率本來已經偏低，好難透過減息提振市場，更重要係，內房會影響市場對整體經濟信心，所以降準亦好難提振經濟。