【專家分析】現價買攜程博黃金周前反彈

【Now財經台】內地將於9月29日起，展開長達8日嘅中秋連國慶長假期，若計埋長假後嘅周末，即10月7日至8日，足足有10日假期，比年初嘅春節假期更長。

距離「十一黃金周」仲有約兩星期，元宇證券投資總監林嘉麒表示，今次係疫情後第1個國慶長假期，市場預期，出遊人數會比暑假更多，可以考慮現價部署定出遊相關股，當中較睇好攜程集團(09961)及同程旅行(00780)，因為兩家公司嘅中期業績，明顯受惠於復常後有更多旅客預訂行程。

KK續指，攜程出咗中期業績後，唔少投資者借好消息出貨，拖累股價自高位約330元跌至現水平，即280元水平，亦係100天線水平，同7月下旬表現差唔多，佢認為，攜程現價未完全反映業績，以及暑假旅遊熱潮等利好因素。

佢又話，旅遊平台一般會率先公布假期預訂數據，比其他黃金周概念股更早有炒作，預期攜程股價有機會再炒上，現價買入博反彈嘅勝算高。