【FINTERVIEW】恒指跌到呢個位或有支持

【Now財經台】內房民企龍頭碧桂園(02007)陷入流動性壓力，旗下11隻境內公司債券今日(14日)起停牌，加上內地上周五(11日)出爐嘅7月新增貸款數據遠遜預期，恒指今朝開市即失守19000關，一度瀉逾500點，低見18554點，已蒸發大部分政治局會議利好帶嚟嘅升幅。

招銀國際證券股票部執行董事蘇沛豐估計，港股短線喺18500點或有支持，佢分析指，恒指喺5月跌至近18000點後反彈，並展開升浪，而今日低位接近上升通道底部，即18500點，估計將出現技術性反彈。

Daniel續指，即使大市反彈，板塊表現仍會分化，市場或憂慮內房債務問題，令內銀嘅壞帳風險上升，預期呢兩個板塊走勢波動，佢又提醒，雖然內房股反彈幅度大，但值博率唔高。

佢又認為，科網股只係受市況拖累，當港股反彈，呢類高beta值嘅股份通常跑贏大市，至於醫藥股、生物科技股、消費股亦可以考慮喺現水平博反彈。