【期匯決算】布油迫近阻力 再升要睇...

【Now財經台】油價繼續有突破，紐約期油價創今年新高，喺亞洲交易時段又升多咗，主要係地緣局勢愈來愈緊張，但有大行仍維持油價年底預測不變，其中，滙豐證券指紐油每桶睇76美元，倫敦布蘭特期油就睇80美元，如果睇返油價現水平，大行係咪睇得太保守？

艾德金融董事熊俊傑認為，大行預測低過現水平其實唔係唔合理，但有冇需要作出調整，就要視乎未來經濟增長，油價上升主要受俄烏局勢及美國加息周期快將完結帶動，加上石油輸出國組織及盟友(OPEC+)落實減產協議，喺供應減少下有機會進一步推高油價。

Ken又指，依家布油已升穿85美元，已經好接近88美元嘅阻力，要進一步向上就要睇未來半年經濟增長可唔可以持續，還是進一步放緩，甚至陷入衰退，都有可能令油價回落。