【名家給力場】「造車新勢力」超買照追？(下)

【Now財經台】恒生指數今季持續跑贏標普500指數，點解會出現「東升西降」嘅現象？「股市漁夫」創辦人莊志雄分析指，之前港股嘅科技股累積咗好多淡倉，第3季開始見到夾淡倉，就連金龍指數嘅交易所買賣基金(ETF)今季都累升近12%，證明中資科技股走勢好，但佢認為，現時都係留意商品比較好，例如石油相關股。

Lewis續指，第3季商品價格升勢，令能源板塊喺美股中表現最標青，尤其係石油服務股、油氣開發股，相關ETF分別升逾18%及逾13%，值得留意係，升得最好唔係市值最大嘅能源企業或成分股。

此外，Lewis認為，港股嘅新能源車股值得長期關注，並指歐美唔少汽車評論人對中國產電動車嘅評價正面，事實上，板塊早喺第2季已有利好訊號。

過去1個月，藍籌車股比亞迪股份(01211)及吉利汽車(00175)股價僅錄得單位數升幅，反觀「造車新勢力」小鵬汽車(09868)及理想汽車(02015)爆升約30%。

Lewis表示，雖然唔少股份短期已超買，但如果未來業績交到貨，仍睇好新能源車板塊長期走勢。